एनआरएनए अध्यक्षमा कुल आचार्यले गरे उम्मेदवारी घोषणा, सत्तारुढ गठबन्धनको समर्थन रहने - दर्पण संसार

एनआरएनए अध्यक्षमा कुल आचार्यले गरे उम्मेदवारी घोषणा, सत्तारुढ गठबन्धनको समर्थन रहने

काठमाडौं । गैरआवासीय नेपाली संघ (एनआरएनए)का सल्लाहकार तथा पूर्व उपाध्यक्ष कुल आचार्यले संघको अध्यक्ष पदमा उम्मेदवारी घोषणा गरेका छन् ।

आइतबार काठमाडौंमा एक विशेष समारोहको आयोजना गरी आचार्यले २०२१-२०२३ कार्यकालका लागि संघको अध्यक्षमा औपचारिक रुपमा उम्मेदवारी घोषणा गरेका हुन् । सो अवसरमा उनले आफ्नो प्रतिबद्धता पत्र पनि सार्वजनिक गरे । उनले ‘पद्धती र पारदर्शिता, समावेशी एनआरएनए हाम्रो प्रतिवद्धता’ मूल नारा समेत तय गरेका छन् ।

उम्मेदवारी घोषणा गर्दै आचार्यले भने, ‘एनआरएनएलाई सही अर्थमा आम प्रवासी नेपालीहरुको साझा संस्था बनाउने मेरो अभियान हो, संस्थामा सबैको सहभागिता र अपनत्व सिर्जना गरेर यो अभियानलाई पूर्णता दिने छु। ‘पैत्रिक सम्पतिको अधिकार, राहदानी सहित  तेश्रो पुस्तापछि पनि कायम रहने गरी गैरआवासीय नेपाली नागरिकतालाई कार्यान्वयन गर्न सर्वोच्च प्राथमिकता दिने छु।’

अध्यक्ष पदका उम्मेदवार आचार्यले आफ्नो दुई वर्षे कार्यकालमा संसारभर एनआरएनएको पन्जीकृत सदस्य संख्या पाँच लाख पुर्याउने र राष्ट्रिय समन्वय परिषद्हरुको संख्या कम्तीमा एक सय पुर्याउने घोषणा गरेका छन् । हाल एनसीसीको संख्या ८४ रहेपनि कतिपय एनसीसीहरु निष्कृय रहेका छन् भने संघका पन्जीकृत सदस्यहरुको संख्या एक लाखको हाराहारीमा छ ।

गैरआवासीय नेपालीहरुलाई मात्रै नभई संसारका विभिन्न देशमा रहेका नेपाली मूलका मानिसहरुलाई पनि जोड्ने उनको योजना रहेको छ । थाइल्याण्ड, म्यानमार लगायतका मुलुकमा बसोबास गर्ने नेपालीलाई  ‘पिपुल अफ नेपाली ओरिजिन ९पिएनओ०को मान्यता दिलाउन पहल गर्ने आचार्यले घोषणा गरे  ।

उनले संस्थामा देखिएको बिकृति अन्त्य गर्दै संघलाई मर्यादित र प्रतिष्ठित बनाउने प्रण समेत गरे । संघलाई व्यक्तिगत स्वार्थका रुपमा प्रयोग भइरहेकोप्रति आपत्ति जनाउँदै उनले संस्थाको उद्देश्य र गैर आवसीय नेपालीहरुको अपेक्षा अनुसार काम गर्ने प्रतिबद्धता जनाए ।

पर्वतको धाइरिङमा जन्मेका आचार्य हाल बेलायतमा बसोबास गर्दै आइरहेका छन् । उनी लण्डनका स्थापित व्यवसायी हुन् भने समाजसेवी पनि हुन् । करिव दुई दशकदेखि एनआरएन अभियानमा सक्रिय आचार्यले आफ्ना  कार्ययोजना सार्वजनिक गर्दै संगठनको सुदृढीकरण र संस्थागत पारदर्शिताको मुद्दालाई प्राथमिकतामा राखेको बताए ।

अध्यक्षका प्रत्यासी आचार्यले वैदेशिक रोजगारीलाई थप व्यवस्थित र मर्यादित बनाउने भन्दै मध्यपूर्व, मलेसिया लगायतका  मुलुकमा काम गर्ने नेपालीहरुको  सुरक्षामा पनि विशेष ध्यान दिने घोषणा गरे । उनले वैदेशिक रोजगारीमा रहेका र थपिने नेपाली महिला कामदारको सुरक्षा र सीपको विकासमा संघले संस्थागत रुपमा ध्यान दिने उनले बताए  ।

विदेशमा नेपाली भाषा, कला र संस्कृतिको जगेर्ना गर्दै संसारभरि  नेपालको पर्यटन प्रवर्द्धनका लागि अभियान चलाउने उनको योजना छ । प्रवासी नेपालीहरुको खेलकुदप्रतिको चाहना र आकर्षणलाई सम्बोधन गर्न एनआरएनए खेलकुद प्रतिष्ठान स्थापना गर्ने घोषणा पनि आचार्यले गरे।

नेपालमा गैरआवासीय नेपालीहरुको लगानी मात्रै नभई प्रत्यक्ष वैदेशिक लगानी भित्र्याउन पनि आफूले पहल गर्ने बताउँदै आचार्यले भने, ‘विदेशी लगानी भित्र्याउन केही कानुनी जटिलता छन्, त्यसलाई सुल्झाउनुपर्छ, मेरो ध्यान यसमा केन्द्रित हुने छ।’ नेपालबाट अवैधरुपमा विदेश गइरहेको सम्पत्तिलाई रोकी  नेपालमै लगानीको वातावरण बनाउनु पनि मेरो अर्को प्राथमिकता हो, उनले भने ।

संघका अग्रज अभियन्ताहरुलाई सम्मान गर्दै संघको अभियानमा नयाँ पुस्तालाई सक्रिय बनाउने आफ्नो उद्देश्य रहेको आचार्यले बताए । ‘युवा र महिलाहरुलाई पहिलो प्राथमिकतामा राखेर सांगठनिक कामलाई अगाडि बढाउने छु, उम्मेदवारी घोषणासभामा उनले भने । संघलाई राजनीतिक रुपमा नभई सेवा भावका आधारमा सञ्चालन गर्ने उनले बताए ।

आचार्यको उम्मेदवारीलाई संघका बहुसंख्यक  राष्ट्रिय समन्वय परिषद ९एनसीसी०हरुले समर्थन जनाएका छन् । एनसीसी युकेबाट संघको यात्रा थालेका आचार्यले एनआरएनए यूकेको अध्यक्ष, आइसीसी सदस्य, यूरोप क्षेत्रको संयोजक, आइसीसी उपाध्यक्ष र सल्लाहकारका रुपमा काम गरेका छन्।

आचार्यले अगाडि सारेका एजेण्डा र प्रतिबद्धतासँग सहमति जनाउँदै आइसीसीका अन्य पदमा पनि उम्मेदवारी घोषणा भएको छ । संघको महासचिव पदमा अमेरिका निवासी एनसीसी अमेरिकाको दुई कार्यकाल नेतृत्व गरिसकेका चिकित्सक डा।केशव पौडेलले उम्मेदवारी घोषणा गरेका छन्  ।अमेरिकास्थित एक अस्पतालका मेडिकल डाइरेक्टर पौडेल एनआरएनए अभियानमा लामो समयदेखि सक्रिय अभियन्ता हुन् । आचार्यको नेतृत्वमा संघलाई पारदर्शी र परियोजनामुखी बनाउने अभियान अन्तर्गत आफूले महासचिव पदमा उम्मेदवारी दिएको पौडेलले बताए ।

कार्यक्रममा एनआरएनएका संस्थापक महासचिब तथा पूर्वराजदूत भीम उदास, आइसीसीका उपाध्यक्ष सोनाम लामा, एनआरएनए अभियन्ताहरु जानकी गुरुङ, हरिबोल भण्डारी, सोम सापकोटा, कविन्द्र न्यौपाने, मनोज गोर्खाली, बेद प्रसाद खरेल, रन्जना उदास, दीपक पुनलगायत सयौंको सहभागिता थियो ।

कुल आचार्यको टीमलाई नेपाली कांग्रेसलगायत सत्तारुढ गठबन्धनले समर्थन गर्ने जनाएको छ । गठबन्धनले आचार्यको टीम नै समावेशी र संस्थाका लागि उपयुक्त देखिएको भन्दै समर्थन गर्नेगरी गठबन्धनभित्र दैनिक बहस भइरहेको छ । सत्तारुढ दल निकट मानिएका उम्मेदवारहरुलाई आचार्यको टीमलाई सहयोग जुटाउन आन्तरिक सर्कुलर जारी भएको बुझिएको छ ।

आचार्यका मुख्य कार्ययोजना 
-पैत्रिक सम्पतिको अधिकार, राहदानी तथा तेश्रो पुस्ता पछि पनि कायम रहने गरी गैरआवासीय नेपाली नागरिकतालाई कार्यान्वयन गर्ने ।
-म्यान्मार, थाइल्याण्ड लगायतका मुलुकमा बसोबास गरिरहेका नेपाली मूलका दाजुभाइ दिदी बहिनीहरुलाई पिपुल अफ नेपाली अरिजिन (पिएनओ)को मान्यता दिलाउन अधिकतम प्रयास गर्ने ।
-संघका पंजीकृत सदस्यहरुको संख्या ५ लाख पुराउने ।
-राष्ट्रिय समन्वय परिषद (एनसीसी) हरुको संख्या १०० पुराउने  ।
-नेपाल सरकार तथा निजी क्षेत्रसंगको सहकार्यमा ‘एनआरएनए सीप विकास केन्द्र’ स्थापना गरिने छ ।
-बढी भन्दा बढी मुलुकहरुसंग  द्वीपक्षीय लगानी प्रवर्द्धन तथा परियोजना सहमति एवं दोहोरो करमुक्ति जस्ता सम्झौताहरु गर्न नेपाल सरकारसँग सहकार्य गर्न संस्थागत पहल गरिने छ।  
-खाड़ी राष्ट्रमा रहेको नेपालीहरुको सानो सानो पूंजीलाई एकीकृत गर्दै मुनाफामूलक क्षेत्रमा सामूहिक लगानी अवधारणालाई अगाडी बढाइने छ । 
-कोभिडका कारण रोजगार गुमाएर फर्केका युवाहरुका लागि ‘एक एनआरएन एक रोजगार अभियान’ शुरु गरिने छ ।
-एनआरएन तथा नेपालमा रहेका तिनका परिवारलाई सहुलियत दरमा गुणस्तरीय सेवा उपलब्ध गराउन विभिन्न स्वास्थ्य संस्थाहरुसंग सम्झौता गरिने छ ।
-विदेशमा हुर्की रहेका बालबालिकाहरुलाई नेपाली भाषा सिकाउन पाठ्यपुस्तक र मोबाइल एप निर्माण गर्न अनलाइन कक्षाहरु संचालन गरिने छ ।
-एनआरएन खेल प्रतिभाहरुको विकासमा सघाउन एनआरएनए खेलकुद प्रतिष्ठान स्थापना गरिने छ ।

 

प्रतिक्रिया दिनुहोस्