के साच्चै नेपालीहरु खान नपाएर विचल्ली भएकै हो त लण्डनमा ? - दर्पण संसार

के साच्चै नेपालीहरु खान नपाएर विचल्ली भएकै हो त लण्डनमा ?

हामीलाई सूचनाको अभाव मात्रै भएको हो

 


सबैभन्दा ठूलो कल्चर र अनुशासन नै हुन अनि अनुभवले पनि व्यवस्थित गर्दो रहेछ मान्छेलाई । क्षणिक आवेग र वुझाईको कमीले धेरै अप्ठ्याराहरुको सामना गर्नु पर्ने हुन्छ मान्छेले । नबिर्सौ यो समाज हो हामी सामाजिक प्राणी हौ र सामाजिक व्यवहारमा नै विश्वाश राख्छौ ।

आफ्ना नागरिकको सुरक्षामा राज्य जिम्मेवार हुनुपर्छ यो अकाट्य छ । साधन , श्रोत र क्षमताले भ्यायसम्म राज्यले आफ्ना नागरिकको रेखदेख र सुरक्षामा कुनै कसुर राख्न मिल्दैन I भोकमारी, प्राकृतिक प्रकोप , दुर्घटना , युद्ध जस्ता कठिन र संवेदनशिल परिस्थितिमा राज्यसंग समन्वय र सहयोगी भई अनुशासित बन्नुको विकल्प छैन ।

मानव विकाश र सभ्यतामा निकै अगाडि रहेको युरोप अहिले रोग महामारीले आक्रान्त छ । युरोपियनहरू सरकार मातहत र निकाए अन्तर्गतका निति र नियमहरुलाई अनुशासित भई पालना गरेर राज्यलाई सहयोग गरिरहेका छन र यो एउटा सुन्दर अभ्यास पनि हो ।

हामी लगभग दुईलाख नेपालीहरू पनि बेलायतमा छाै । यो रोग प्रकोपको समय हो । कसैलाई थाहा छैन हामीमध्य कतिलाई रोग लागिसकेको छ वा लाग्नेछ । यसको समाधान न एक व्यक्ति वा सामाजिक संस्थाले गर्छ न त सरकार नै यसलाई व्यवस्थित गर्न सक्छ । त्यसैले नेपाल सरकार र विदेशस्थित तिनका कुटनितिक निकाय , विभिन्न सामाजिक संघसंस्थाका प्रतिनिधिहरु , एनआरएनए लगाएत सम्पूर्ण नेपालीहरु अहिले एक हुनुको विकल्प छैन ।

कुरा १० केजी चामल र ३ वटा कोठा अनि दुई जना समाजसेवीको होइन । नेपालीहरू खान पाएका छैनन , रोडमा सुतेका छ्न , बेलायतमा नेपालीको विजोग छ भनेर गरिने अनावश्यक प्रचारबाजी र हाम्रा अभ्यासले नेपालमा रहने अभिवावकमा पर्ने असर र अन्तर्राष्ट्रीय समुदायमा हाम्रो व्यवहार , संस्कार र क्षमताको प्रभाव र प्रश्न चिन्ह हो ? त्यति भन्दैमा जिम्मेवारबाट पन्छिएर समाजसेवा गर्नेको मन दुःखाउने भने पटक्कै होइन यसले हामी माथि पार्ने दुरगामी असरका बारेमा चिन्तित मात्रै हो

पछिल्लो अभिलेखमा यूकेमा ५०० को हाराहारीमा नयाँ नेपाली विद्यार्थीहरु भित्रिएका छन । नेपाली दुतावास लण्डनले नेपाली विद्यार्थीहरु अध्ययन गर्न आएका वेलायती विश्वविद्यालयहरूमा सम्पर्क गरेर उनीहरुको व्यवस्थापनमा बेलायत सरकार , नेपाल सरकारसंग छलफल गरिसकेको छ । नेपालबाट समयमै उड्न नपाएका गोर्खाहरुको पेन्सन निरन्तर राख्न बेलायत सरकारलाई पत्राचार गरेको छ । भिषाका कारणले नेपाल जान नपाएका विभिन्न खाले नेपाली लगायत अन्यलाई मे ३१, २०२० सम्म वेलायतमा कानुनीरूपले बस्ने व्यवस्था मिलाएको छ । ९८ प्रतिशत राजदुतावास लण्डनमा बन्द भइसकेका छन तर पनि नेपालीहरुका समस्या सम्बोधन र व्यवस्थापनका लागि नेपाली दुतावास खुल्ला रहेको छ । आपतमा परेका विद्यार्थी र नेपालीलाई व्यवस्थापन गर्न नेपाली दुतावासले विभिन्न नेपाली सामाजिक संघसंस्था र एनआरएनए मार्फत आफ्नो काम शुरु गरिसकेको छ ।

हामीलाई सूचनाको अभाव मात्रै भएको हो । बेलायत सरकारका साथै आप्रवासी र अन्तर्राष्ट्रीय विद्यार्थीका लागि सहयोग गर्न सयौंका हाराहारीमा च्यारिटीका संस्थाहरु छन । मन सानो बनाउने , आफूखुशी विषयवस्तुलाई व्याख्या गर्ने , बदला लिने , राजनैतिक प्रतिशोध लिने, अरुलाई दोष दिने , सरकारको आलोचना गर्ने भन्दा पनि एउटा संस्कारयुक्त व्यवस्थापनमा जुट्नु पर्ने बेला हो यो ।

हामी लण्डनमा भोका छैनौ र रोडमा पनि सुतेका छैनौ मात्र हामी संस्कार र अभ्यासका गरिव हौ । आफूभित्रका समस्या पहिचान गरौ ५ /१० केजी र एक रातको निँद्रा विकराल समस्या होइन । चुरो कुरो हाम्रो असभ्यता र क्षमताको हो ।

 

"

"

प्रतिक्रिया दिनुहोस्