नेपालबाट ३४ अर्बभन्दा बढी ‘कालोधन’ अवैध ओसारपसार तथा कारोबार भएको खुलाशा - दर्पण संसार

नेपालबाट ३४ अर्बभन्दा बढी ‘कालोधन’ अवैध ओसारपसार तथा कारोबार भएको खुलाशा

काठमाडौं । नेपाली बैंक र कम्पनीहरुमार्फत ३४ अर्बभन्दा बढी कालोधनको अवैध ओसारपसार तथा कारोबार भएको खुलाशा भएको छ ।

वित्तीय कारोबार प्रणालीबारे निगरानी राख्ने अमेरिकाको सरकारी निकाय ‘फाइनान्सियल क्राइम्स इन्फोर्समेन्ट नेटवर्क’ (फिनसेन) ले तयार पारेका अति गोप्य कागजातका आधारमा खोज पत्रकारहरूको अन्तर्राष्ट्रिय सञ्जाल ‘इन्टरनेशनल कन्सोर्टियम अफ इन्भेष्टिगेटिभ जर्नालिष्ट’ (आईसीआईजे) ले यो खुलासा गरेको हो ।

गैरकानूनीरूपमा आर्जन गरेको शंकास्पद धन ओसार पसारमा नेपालका केही बैंक र कम्पनीहरू संलग्न रहेको खुलासा भएको हो । यो खुलासालाई ‘फिनसेन फाइल्स’ भनिएको छ ।

सन् १९९९ देखि २०१७ सम्मको अवधिमा बैंकहरूले आफ्ना ग्राहकको शंकास्पद आर्थिक गतिविधिबारे निगरानी गरी ‘फिनसेन’ लाई जानकारी दिएका थिए ।

ती जानकारीहरू प्राप्त गरी ‘बजफिडन्यूज‘ र आईसीआईजेले विश्वभरिका आफ्नो नेटवर्कमा रहेका पत्रकारहरूसँगको सहकार्यमा गरेको खोजलाई ‘फिनसेन फाइल्स’ नाम दिइएको हो ।

जसअनुसार, सन् २००६ को डिसेम्बरदेखि २०१७ को मार्च महिनासम्म ११ वर्षभित्र नेपालका ९ वटा बैंक, १० वटा कम्पनी र विभिन्न व्यक्तिहरूले सीमापार व्यापारका नाममा शंकास्पद धनको कारोबार र ओसार–पसार गरेको खुलेको छ ।

सुन, अलकत्रा, पुरातात्विक सामग्री, दूरसञ्चार उपकरण सामग्रीको अन्तर्राष्ट्रिय तस्करीमा नेपाली संयन्त्रहरू जोडिएका देखिन्छन् ।

शंकास्पद धनको कारोबार र ओसार पसार गरेको भन्ने ‘फिनसेन फाइल्स’ को सूचीमा नेपालका ठूला र चर्चीत ‘क’ वर्गका वाणिज्य बैंकहरु पनि रहेका छन् ।

खुलासाअनुसार ११ वर्षको अवधिमा यी बैंक र कम्पनीहरूबाट कुल ३४ अर्ब ८४ करोड २७ लाख ७० हजार १०२ रुपैंयाको शंकास्पद धन कारोबार र ओसार पसार भएको छ । यो रकम आर्थिक वर्ष २०७७–७८ मा गण्डकी प्रदेश सरकारले संसदमा प्रस्तुत गरेको बजेट बराबर हो ।

"

प्रतिक्रिया दिनुहोस्