कोरोना प्रभावितको साहारा बन्दै बाग्लुङका टंक सापकोटा १० हजार पोर्चुगिजलाई निःशुल्क खाना खुवाउने - दर्पण संसार

कोरोना प्रभावितको साहारा बन्दै बाग्लुङका टंक सापकोटा १० हजार पोर्चुगिजलाई निःशुल्क खाना खुवाउने

 

काठमाण्डौं, २० असार । कोरोना भाईरस (कोभिड–१९) को महामारीका कारण प्रभावित भएका पोर्चुगलका निम्न बर्गीय परिवारलार्ई लक्षित गरेर एक नेपालीले निःशुल्क खाना अभियान सञ्चालन गरेका छन् ।

बाग्लुङ दमेकका ४६ वर्र्षीय टंक सापकोटाले पोर्चुगलका निम्न बर्गीय परिवारका लागि निःशुल्क खाना अभियान सञ्चालन गरेका हुन् । इटालीयन सेफका रुपमा चर्चित सापकोटाले राजधानी लिस्बनका २५ सय परिवारका करिब १० हजारलाई निःशुल्क खाना खुवाउने अभियान सञ्चालन गरिएको जानकारी दिए ।

कोरोनाको महामारीका कारण रोजीरोटी गुमाएका लिस्बन महानगर अन्र्तगतका २४ वटै वडाका बिपद्मा परेका परिवारलाई निःशुल्क खाना खुवाउन लागिएको हो । “हामी एक्लैले संसार बदल्न त सक्दैनौं, तर संसार बदल्न सहयोग गर्न सक्छौं” भन्ने मूल नाराका साथ सापकोटाले कोरोनाको महामारीबाट प्रभावित भएकाहरुलाई लक्षित गरि १० हजार पिज्जा निःशुल्क खुवाउन लागेका हुन् ।

२५ बर्षदेखि सपरिवार पोर्चुगल बस्दै आएका सापकोटा इटालीयन खानाका लागि युरोपमा प्रख्यात छन् । सापकोटा पाोर्चुगलका एक सफल व्यवसायी पनि हुन् ।

कोरोनाको महामारीबाट प्रभावित भई समस्यामा परेका परिवारलाई एक छाक मात्र भएपनि खाना खुवाएर सहयोग गरौं भन्ने उद्धेश्यले निःशुल्क खाना अभियान सञ्चालन गरिएको सापकोटाले बताए । “हामीले परोपकार र बिशुद्ध सेवाभावले निःशुल्क खाना अभियान सञ्चालन गरेका हौं,–‘सापकोटाले भने ।, बिपद्का बेला सामाजिक उत्तरदायित्व वहन गर्नुपर्छ, निस्वार्थ सेवा गर्नुपर्छ भनेर सकारात्मक सन्देश प्रवाह गर्ने हाम्रो प्रयास हो ।”

सापकोटाले उक्त अभियानका लागि घुम्ती शिबिरकै रुपमा खाना पकाउने ब्यबस्था मिलाएका छन् । जसका लागि ३१ हजार युरो अर्थात् झण्डै ४१ लाख नेपाली रुपैयांको लागतमा पिज्जा पकाउने चुल्हो (र्फोनो) खरिद गरि मोबाईल चुल्हो कै रुपमा सञ्चालनमा ल्याएका छन् ।

गत १६ जुन देखि लिस्बनको बेलेई बाट शुरु भएको अभियान ११ जुलाई सम्म सञ्चालन हुने सापकोटाले जानकारी दिए । घुम्ती शिबिर भएका कारण चुल्हो पू¥याउने, खानाको तयारी गर्ने लगायत फिल्डमै सिंगो रेष्टुरेन्ट सञ्चाल गर्नुपर्ने हुँदा धेरै खट्नुपरेको छ । कोरोना कहरका बिच सर्तक भएर काम गर्नुपर्ने चुनौती पनि छ । तर समस्यामा परेकालाई खाना खुवाउन पाउंदा आनन्दको अनुभूति भएको छ– सापकोटाले भने । सापकोटाका अनुसार तयारीको काम दिनको १ बजेबाटै शुरु हुन्छ । सांझको खानालाई लक्षित गरिएकाले खाना बितरण भने सांझ ६ देखि राती १० बजेसम्म गरिएको छ ।

“हाम्रो अभियानलाई महानगरले समेत बिशेष महत्व दिएर साथ दिएको छ । महानगरका उपमेयर समेत दैनिक जसो अभियानमा सहभागी हुन आउनुहुन्छ । उहांको उपस्थितीले हामीलाई थप उर्जा र हौशला मिलेको छ– सापकोटाले खुशी ब्यक्त गर्दै भने ।” महानगरका केही सरकारी कर्मचारी सहित ५ सय जनाले स्वतस्र्फूत रुपमा यो अभियानलाई स्वयंसेवकका रुपमा सघाएको सापकोटाले बताए ।

उक्त अभियानमा सापकोटा सहित १५ जना कामदार खटेका छन् । एक दिनमा तीन सय पिज्जा बितरण गर्ने लक्ष्यका साथ काम भईरहेको उनी बताउंछन् । खानाको तयारी देखि लिएर पिज्जा पकाउने सबै काम फिल्ड बाटै गरिएको छ । ताजा र गुणस्तरयुक्त खाना खुवाउने अभिप्रायले घुम्ती शिबिर सञ्चालन गरिएको सापकोटाको भनाई छ । तयार भएको खाना घर सम्मै पू¥याउने ब्यबस्था समेत मिलाईएको उनले बताए ।

सापकोटाको उक्त अभियानको ब्यबस्थापनमा भने अर्का नेपाली ब्यसायी लक्ष्मी प्रसाद सापकोटा जुटेका छन् । रेष्टुरेन्ट ब्यबसायी समेत रहेका उनले टंक सापकोटाको यो अभियानले नेपालीको गौरव बढाएको प्रतिक्रिया दिए । शुक्रबार सम्म १५ वटा वडाका करिब ६ हजारलाई खाना खुवाईएको सापकोटाले जानकारी दिए ।

महानगरले उपलब्ध गराएको सुचिका आधारमा गरिब तथा बिपन्न परिवारलाई खाना बितरण गरिएको छ ।
सापकोटाका अनुसार एक महिने निःशुल्क खाना अभियानका लागि करिब ९७ हजार युरो अर्थात् एक करोड बढी नेपाली रुपैयां खर्च हुने अनुमान गरिएको छ । यसरी निःशुल्क रुपमा खुवाउन लागिएको पिज्जाको प्रति मूल्य करिब ७ युरो अर्थात् नौ सय नेपाली रुपैयां पर्न आउने सापकोटाले बताए ।

सापकोटाको आफ्नै लगानीमा पोर्चुगलको राजधानी लिस्बनमा तीन वटा इटालियन र दुई नेपाली गरी पाँच रेष्टुरेन्ट सञ्चालनमा रहेका छन् । सापकोटाले सञ्चालन गरेका र्फोनोे दी ओरो रेष्टुरेन्ट विश्वकै उत्कृष्ट २० पिज्जा बनाउने रेष्टुरेन्ट मध्येको एक हो ।

संयुक्त राष्ट्रसङ्घीय सांस्कृतिक निकाय (युनेस्को) ले इटालीको प्रख्यात ‘न्यापोलितान पिज्जा’ बनाउने (दाउरा बालेर ईंटाको ताप्केमाथि पिज्जा बनाउने अद्वितीय सांस्कृतिक र खानपानको परम्परा) कलालाई विश्व सम्पदा सूचीमा समावेश गरेको छ । जसमा सापकोटाले सञ्चालन गरेका दुई वटा रेष्टुरेन्ट समेत उक्त सुचिमा समावेश भएका छन् ।

सापकोटाले सन् २०१८ मा इटालीबाट खरिद गरि ल्याएका बिश्वकै ठूलो र दूर्लभ प्रजातिको बहूमूल्य च्याउ (ह्वाइट ट्रफल) पोर्चुगलमा सार्वजनिक गरेका थिए ।

उनले इटालियन खानामा प्रर्दशन गरेको कला र प्रतिभा कै कारण दर्जनौं पुरस्कार समेत प्राप्त गर्न सफल भएका छन् । सन् २०१६ मा उनी पोर्चुगलमा युवा सिर्जनशील व्यवसायी समेत घोषित भएका थिए ।

 

 

प्रतिक्रिया दिनुहोस्